سأحتفل بحواسي .. وألعب بالجيلي!

ما بعرف نشاط حسي أحلى من هيك للأطفال، رائحة ولون وملمس وتحفيز لكل سنتمتـــر بخيالهم. أكيد كانت (ماريا مونتيسوري) رح تحبني على هالفنّــــة ^_^

اللعب بالجيلي، الحقيقة هاد النشاط أنا حبيتو لإني ما بحب هي الأكلة تبع كل عيد ميلاد فانتقمت منها بطريقتي ;) والحقيقة الجيلي لقيته أظرف للعب من الأكل بما إني بعتبره من الأكلات اللي بلا طعمة كلها سكر وملونات.

نشاط حسي كثير حلو وبشهي للأطفال، ريحته حلوة، طعمته طيبة، ملمسه غريب ومحفز، ألوانه حلوة، بيستخدم فيه الطفل حواسه الخمسة وزيادة. وأهم الشي تنظيفه سهل، وجميل لكل الأعمار، من وقت ما يبدأ الطفل يجلس ويتوازن يعني ممكن عالسنة أو أقل حتى. هلأ اللي بدهم يقولوا هاد أكل وما بصير نلعب فيه، رح جاوبهم مثل ما جاوبت زوجي: هاد مو أكل، هاد سكر وصباغ ألوان ومواد حافظة. 

اللعب فيه مفتوح، ما في صح وغلط، فراشتي اختارت تجيب أغراض المطبخ تبعها وتعمل طبخة قال فيها كيوي وكرز وبندورة وخيار، وصارت تقطع وتعبي هالطناجر وتكب وتعبي كإنها شي شيف.

جيبو جيليه بألوان مختلفة، ذوبو كل لون لحال بنص كمية الماء المكتوبة على العلبة مشان يطلع قوامه أسمك (يعني بدل 200 مل ماء ذوبو كل ظرف بـ 100 مل) واتركوهم بالبراد شي ساعة أو ليجمد. ممكن تعملو الجيلي على أشكال باستخدام قوالب مختلفة، مثلاً في قسم حطيته ليجمد بألعاب الرمل بعد ما غسلتهم طبعا. اقلبوهم على صينية أو كرتونة، وهون راقبوا الحماس لما يغوصوا أطفالكم بالجيلي وصوروا وابعتوا لـ {تفنّـن}. 

أهم شيء ويمكن رح تملو من كثر ما رح عيد هالجملة

لجعل عملية التنظيف أسهل بدل ما تتحول لتعزيل، احصروا اللعب بمكـــــــان واحــــــــد

بالبيت عندي وبدون ما نبه بنتي حفظت القاعدة >> ممنوع تمشي وتتمختر وقت النشاط، وممنوع ترمي أي أداة أو تنثر أي مادة بين إيديها<<