التجليد، ومن كل عقلي كنت مفكرته بس لجلد فيه الدفاتر قام طلع أداة لاصقة عظيمة لأي موضوع نشاط ممكن نقترحه على أطفالنا، يعني مثلاً البارحة بدل ما قلها لفراشتي ارسمي فصل الصيف، قلتلها تعي نلصق فصل الصيف!
ما بعرف طفل ما بحب القص واللصق! كلهم بحسهم نفسهم يلزقو البيت بالصمغ ويقصو أي ورقة شاردة من درج أهاليهم.
بهالنشاط ما اعتمدنا على التلوين والرسم قد ما اعتمدنا على القص واللصق والأوراق الملونة والمجلات، أي أوراق ملونة، جرايد، مجلات مصورة بتوقع بإيدكم (مجلات المفروشات، الأدوات الكهربائية، التصميم...) بتصلح لتكون مشروع أوراق مقصقصة، (الصورة 2) بهالطريقة نحنا منكون عم نعرف أطفالنا على نوع حديث من الفن معروف باسم الفن التلصيقي Collage Art
حاولت عرف بنتي عليه لما كانت 3 سنين، وكان عندي مجلة أزياء وموضة بوقتها، وطلبت منها تتفرج عليها وتقص الصور اللي بتحبها وتلزقها مع بعض على ورقة بيضاء بس اللي صار إنها قصقصت الورقة البيضاء واتعففت عن المجلة :/
بعكس البارحة، كثير انسجمت بالفكرة وصارت ادور لحالها بالمجلة على شيء بناسب فكرة فصل الصيف لتقصه، قبل ما نبدأ سألتها:
لما قللك فصل الصيف شو أول شيء بيخطر على بالك؟
أول جواب كان الآيس كريم، بعدين قالتلي اللعب والنص كم والبحر، وأنا اقترحت عليها فكرة الـ flip flop، النشاط كله كان مسلي، عملناه على يومين، والنتيجة كانت لوحة لذيذة على الشباك وبالنسبة إلي كل اللصقات كوم والزنوبة الجميلة كوم ثاني ^_^
لوضح كيف عملنا هاللوحة الصيفية، عادة بعلق قطعة من التجليد على الشباك (الصورة 1) بحيث يكون الوجه اللاصق لعندي يعني بلصقها من الزوايا فقط بقطع تجليد صغيرة كإني عم الصق كرتونة مثلاً. كان عنا دفتر نشاطات انكليزية قديم صوره لذيذة وقلت الحمد الله اللي ما كبيته، كان محفز رائع للقص (الصورة 3). للبحر استخدمنا أوراق زرق وقصقصناهم خطوط متعرجة ومربعات لنملأ الفراغات (الصورة 4). أما للرمل فما كان عنا ورق ملون بني لهيك طلبت من فراشتي تلون ورقة بيضاء بالبني ونشفناها بالسيشوار لإن الأطفال صبرهم قليل (الصورة 5). ولو كان عندي جريدة كان ممكن نرسم عليها أشكال كمان ونلونها، نوع ورق الجرايد مع الكتابة الصغيرة عليها والألوان بيعطوا تأثير فني رائع برأيي.
بحب ضيف ملاحظتين مهمتين هون:
- هالنشاط مناسب جداً للأطفال الصغار جداً يعني تحت السنتين، بدون المقص طبعاً، ممكن نعطيهم قصاصات ملونة عشوائية أو أشكال هندسية ونتركلهم المجال يمسكوا كل قصاصة ويلصقوها.
- نشاط القص ونشاط المعجون من أهم الأنشطة اللي بتساعد الطفل يقوي أصابع إيديه، ولما تقوى أصابع إيديه بصير قادر على إنه يتحكم بالقلم أكثر وبالتالي يتعلم الكتابة بشكل أفضل.
