>> كل نشاطاتنا المصورة وخبرتنا المتواضعة لليوم على هالرابط <<
كم بقعة على ثياب أطفالك
رحت على خزانة بنتي واكتشفت إنه ولا نص بقعة موجودة، كله نظيف ومرتب وأكابري وإذا وزعته بفكروه جديد! هالجملة وهالموقف غيروا كل نظرتي للعب الأطفال، فكرة المقال كانت إننا نعطي أطفالنا حرية اللعب وحرية الفن الفوضوي، الطفل اللي ما في على أواعيه ولا بقعة، وعلى جسمه ولا علام طرقة، هاد طفل مقيد بقيود نحنا فرضناها على عقله قبل حركته، واللعب اللي نحنا منسميه "تخبيص" الأطفال بشوفوه قمة الاكتشاف!
وهيك بدينا، وصرت دور وابحث على نشاطات فنية حسية ودرب نفسي على إني اتقبل فكرة الفوضى باللعب وفكرة إنه نظافة البيت مو أهم من لعب وإبداع فراشتي. وبهالبحث طبعاً بتطلع ذكريات طفولتنا، حصة الرسم -الفن على أساس- كانت دائما مرتبطة بالألوان الخشب أو الشمع اللي بعلبة سماوية، ودائماً نفس الاقتراحات (ارسم فصل الربيع وارسم العودة إلى المدرسة) !! مين بحب يلون صفحة كاملة بألوان خشب، هي عقوبة مو فن :/ بضيقو الخلق، وبوجعو الإيدين، لهيك انتقمت من كل حصص الرسم المملة بطفولتي وأول ألوان جبتهم لبنتي كانوا ألوان الأصابع 'Finger paint'
تحدي ثاني واجهني هو صور النشاطات الفنية! إي الصور، كانت غالباً تحبطني أكثر ما تشجعني، طفل عم يلون بكل هدوء وحبابية وبس -بس- نقطة لون على أنفه مشان الصورة مو مشان شي :/ التحدي الثالث هو نوعية النشاطات الفنية، يعني نشاط فني مع الطفل بكون يا أما كثير بايخ يا أما كثير معقد، وعملياً اللي عم يشارك الصورة مو مختبر هالنشاط. وصلت لنتيجة إنه النشاطات الفنية مع الأطفال مثل وصفات الطبخ، لازم تكون مجربة ومختبرة لتكون واقعية ومنطقية ويشعر المتلقي إنها قابلة للتطبيق! هي الأم عملت هيك مع أطفالها معناها أنا فيني أعمل، الصور الأنيقة اللي الطفل فيها عم يلون وهو بكامل أناقته ونظافته وكل شي حواليه أبيض ونظيف متل الوصفة اللي الكل قال عنها شكلها طيبة وسهلة بس ما حدا طبقها، لهيك ما في نشاط رح اكتب عنه إلا مُوقع من فراشتي -مع الموافقة- ولا في صورة رح تنزل بالمدونة إلا من كاميرتي.
طبعا ممكن احكي عن الفوضى اللي سببها نشاط معين، بس ما رح صور سلة الغسيل اللي ما بتفضى والمنشر اللي ما بينطوى، ممكن اكتب أديه أخد معي وقت تنظيف بس ما رح صور الأغراض والكراكيب اللي بدفشها على جنب وبتتكوم لبين ما اخد اللقطة لبنتي وهي بقمة استمتاعها، وأنا عم بضحكلها وكومة الكراكيب اللي ع جنب عم تزورني وإزورها!
يعني الخلاصة، مدونة {تفنّـن} هي
فن واقعي مع الأطفال مع شوية تحرير لزوم البريستيج
وكل هدفي شجعكم وشجع نفسي لتكون نشاطاتنا مع أطفالنا سواء حركية ولا فنية {أولوية} بحياتنا
والله يقوينا ^_^
والله يقوينا ^_^
